GULA APUNG

Pengawa begaga ke GULA APUNG.

Mayuh kitai ngelala gula apung. Mayuh kitai rindu makai gula apung. Tang enda mayuh kitai nemu bakani chara ngaga gula apung. Ke sekali tu, aku bekunsi enggau kita bakani chara gula apung tu digaga. Lalu ke sekali tu, aku mai kita nemuai ngagai menua Perpat lalu meda bakani chara gula apung menua Perpat digaga.

Sebedau nya, dulu aku madah ngagai kita reti bansa utai tumbuh ti digela APUNG tu. Nyadi, apung tu bansa utai tumbuh (perupa) ba pantai tebing ai di menua ili, ti tau bekerang tang enda bediri baka upa bukai, lalu bepelepah tauka betakang sereta bedaun panjai alus bepenulang. Nama 'saintifik' ngagai apung tu iya nya NYPA FRUTICANS.

Apung tu mayuh guna, ambi ke banding, buah puda iya tau diempa; dan enggau pelepah iya ditunu ke garam, daun iya ditasa ke atap, madu ari mayang iya digaga ke tuak enggau gula, sumbuk iya dititi ke daun ruku tauka ditusuk nyadi kajang lalu upa iya tau digaga ke sayur.
Nyadi buah apung tu suah disebut orang buah apung balu; buah apung tuai ti lama udah tingkil ari tandan ti ngujungka iya kekadang beranyut dibai ai kulu kili!

*Gambar pengias: begaga ke gula apung.