Lampu pandang

Mulai ke pengingat

Lampu pandang @ Lampu Pigo

Kelia, sebedau mensia mayuh bekena ke kelita chap amoi enggau bansa kelita ke bukai, lampu pigo tu entara perengka kena betenggau tauka dikena maya malam hari awakka tau meri penampak enggau penerang. Lalu pia mega, bedau mensia mayuh bekena ke lampu kebait, lampu pigo tu mega suah dikena maya nyuluh malam lebuh begiga ke jelu enggau lebuh pengawa begiga ke utai dalam ai sungai baka ikan enggau pama.

Lampu pandang tauka lampu pigo tu iya nya lampu penyuluh ti nguna minyak gas, bisi pekakas pemanchar baka chapak ti digaga ari temaga, bisi chemeni digaga ari gelas ke dikarung enggau dawai beranyam ngambika lubah agi pechah lebuh tepangka sebarang alai.

Agi mit kelia, lebuh dibai sida aki, sida apai indai bemalam ba langkau umai, ampit tudah aku enggau orang bekena ke lampu pigo tu. Tuchum kediri lebuh ngenang, enti sumbu lampu tu diberi panjai maya tinduk malam, dia lebuh dani pagi lebuh ngerituk idung, meseti lubang idung chelum ketegal asap lampu pigo tu, hahahaha...

Pelaba aku, nembiak rebak baru mayuh enda ngelala nama perengka ti digela lampu pandang tauka lampu pigo tu. Enggai ke kita enda ngelala, tu mih sekeda lampu ti kala dikena orang kelia baik nya kena betenggau tauka kena meri penampak lebuh malam hari!
Ingat mih ke penatai asal diri!

Ari aku,
Pengajar Resa Reza Billie
Tuntung Engkelulut

*Gambar pengias: Lampu Pigo